السيرة الذاتية CV : نصائح ومعلومات مهمة لكل باحث عن عمل أو وظائف شاغرة

كجواب على سؤال “علاش الشركات مكيعطوش ليا وخا سيفط بزاف من السيرة الذاتية CV ؟”، أكيد أي باحث عن عمل كيوقع في هاد situation وباش نعطيو جواب كافي شافي فمن الأحسن نبداو بسؤال “آشنوا المشكل عندي في سيرة ذاتية CV حتى مكيعطوش ليا الشركات” ؟ إليكم نصائح عن كيفية كتابة سيرة ذاتية.

بالنسبة لهادشي لغنقولوه في هاد المقال ماشي بالضرورة يكون معمم على كولشي وماشي بالضرورة تتفق مع كولشي، بالطبع كاينين استثناءات وأسباب ظرفية يفوق مستواها تأثير الفراشة !

نصائح ومعلومات مهمة عن السيرة الذاتية CV

غنحاولوا نعددوا الأسباب اللي ممكن تكون احتمال علاش مكيعطوش عليك الشركات، وخا على الأقل باش دوز Entretien، وكل واحد فيكم يحاول يصحح أو يتفادى الأخطاء لغنذكروها :

1- مشافوش السيرة الذاتية CV ديالك من أصله : أغلب الشركات و cabinet de recrutement فاش كيحطوا شي إعلان عن فرصة عمل Wadifa كيتوصلوا بالمئات من السيرة الذاتية، و أي مكلف بالتوظيف مغاديش يقرا كل CV بوحده ويعطيه وقت، فمثلا توصل ب 300 CVs وفي الغالب أكثر بكثير؛ على الأقل خاص دقيقة لمعاينة كل سيرة ذاتية، وهادشي كياخذ وقت بزاف.

فعلاش كيتوصلوا بهاد الكم الهائل من CVs ؟

المشكل الكبير هو أنك مني كتحط شي annonce طالب فيه بروفيل Technicien كيصدق حتى صحاب الإجازة و Deug و Bac+5 مسيفطين CV ديالهم، وكاين غي لكيسيفط ممسوقوش آشنو طالبين ومقراش الشروط لمطلوبة، فهنا كن أكيد CV ديالك متشافش وسط هاد الكم الهائل من طلبات الترشيح والإميلات.

2- ممقادش السيرة الذاتية CV مزيان : أغلب CVs لكنشوف “مفيهم ميتشاف” حيث مولاه مقادرش يضيع ولو ساعة من وقته باش يقاد سيرته الذاتية مزيان، السيرة الذاتية بحال Passeport ديالك عند Chargé/e de recrutement ايلا كان مطبوع مزيان غادي يعيطوا، كنتي غي مخربقه و مسيفطه، تا هداك recruteur غادي يلوحوا في طاروا الزبل أو يمسح إميلك.

كاينين ناس كيخسروا 20 و 50 و 100 درهم باش يصايب سيرة ذاتية CV دياله و يقاده و كاين لكيقلب مزيان في الأنترنت باش يلقى template لتوالم profile دياله، لهذا دير في بالك را recruteur كيشوف CV ديالك ماشي نتا !

و من الأخطاء لكيوقعوا فيها الأغلبية فاش كيصايبوا CV في Word :

3- عدم تناسق الخطوط والألوان : كثرة الألوان و شكل الخطوط و مرة gras ومرة italique ومرة 30 في taille و مرة 5، ومرة minuscule و مرة majuscule، هاد الروينة كاملة كتعطينا سيرة ذاتية CV موسخ غا في شوفته؛ وهادي هي النظرة لغادي ياخذ عليك recruteur هو أنك “مقاديتي تا CV ديالك عاد نجيو نعطيوك بوسط “، وأحيانا CV ديالك كيبين مدى احترافيتك لللوورد Outils de bureautique.

4- كيكون CV ديالك صعيب باش تقراه : كتلقى formations مخزونين فشي بلاصة و compétences خاشيهم في الجنب و مبين ليا “الصورة ديالك” أو سمية شي شركة معروفة، را كل حاجة خصك تخصص ليها مساحتها وحيز، لا يعقل بلاصة coordonnées ديالك شادة مساحة كبر من expériences professionnelles !

ولا يعقل كاتب ليا عنوان كبير باش تعمر بلاصة شايطة ليك، ولا يعقل أنك داير السطاج هو الأول و خازن الماستر ديالك التحت !

لابد سيرة ذاتية CV يكون مقاد مزيان كل حاجة في بلاصتها و كل حاجة بالعبار، تخيل راسك في بلاصة recruteur آشنو خاص يلقى أول حاجة يقراها في CV ؟ آشنو خصك تبين باش تخليه يقرا CV ديالك كامل ؟

قدما كان سيرة ذاتية CV ديالك بسيط و مقاد و ساهل في القراية و فوق هادشي داير ليه template زوين، كلما هادشي كيعطيك احتمالات أنهم يقراو CV ويعطيوك وقت.

ميمكنش تكون كتعرف تلبس وتقاد لون السروال مع القاميجة و تشوف راسك في المراية تمشط شعرك وتجي حتال CV ديالك لهو كولشي كتعطيه مول cyber أو كدير ليه كوبي كولي من شي CV أو كتفتح Word و كتبدا تزروط !

حاجة أخرى تفاداو تحطو logo ديال كل شركة أو les icones غي كيزيد من Taille سيرتك الذاتية، ومعمرك تسيفط CV ديالك بصيغة .docx من غير ايلا كانوا طالبينه بديك الصيغة، دائما السيرة الذاتية تكون بصيغة pdf وسميه باسمك وكنيتك.

5- ايلا كنتي مزال كتقرا بلاما تبرزط راسك يعيطوا ليك، ويلا كنتي مزال خدام في شركة بلاما تحلم يعيطوا ليك، لا يعقل recruteur غادي يعطي فرصة ليك و نتا مزال مبرزط مع قرايا ولا يعقل يعيط ليك و نتا مزال خدام حيث ماشي بعيد تا هو ديرلوا من بعد هكدا!

6- بعض المرات شركات التوظيف الخصوصية باش ترضي “الزبون” را مكتجيبش ليه أي واحد، را خاص دوزك في scanner ويلا مكنتيش مقاد داكشي را مستحيل يعيطوا ليك.

7- واحد القضية من الأحسن تركزوا عليها و هي أنك دير عنوانك البريدي email بسميتك و كنيتك فقط، تفادى الأرقام أو الألقاب، وتكتب العمر ديالك بلا تاريخ الازدياد كامل، والصورة تكون professionnel ماشي مصور selfie و معرفتش آ شمن فايدة لديك +212 لكتزيدوها، راك غي في المغرب ميعيطوش ليك من كندا.

و أهم حاجة لعنده شي سطاج كتب les tâches لكنتي كدير على الأقل 3 أو 4 من Missions لكنتي كدير، هادوا مهمين بزاف باش كيعرفوا آشنو كتعرف تدير و مهمين أكثر ايلا ذكرتي فيهم mots clés لطالبين في داك البوسط لباغين، كيكونوا مذكورين في الإعلان.

الأكثرية كيدير السطاج بلا missions وبعض المرات تا الخدمة مكيديرش ليها détails، شنو كنتي كدير بالضبط و شنو كانت خدمتك بالضبط، وهادشي كيخلق مشكل recruteur مغاديش يتسنا حتى تجي عنده باش يسولك على شي حاجة لمفروض تكون في CV !

8- بالنسبة للناس لساكنين في مدن أخرى بعيدة على البلاصة في كاين بوسط، دير في بالك recruteur مكرهش يلقى في CV شي واحد ساكن فوق الشركة !

لا يعقل نتا داير ساكن في الرباط و البوسط في كازا و كتقول علاش معيطوش ليا ؟ في نظرك نعيط لواحد ساكن قريب أم واحد بعيد عليا ب 150 كلم ؟؟

لذا أي واحد باغي يدفع لشي مدينة يبدل adresse لديك البلاصة في CV دياله.

9- محدك débutant تواضع، لا يعقل واحد كيقلب على خدمة و كيقوليك بغيت بوسط في الحي الفلاني أو الزنقة الفلانية أو الشركة الفلانية حيث معروفة و Multinationale … را هدا هو الطنز العكري !

ومعمرك تقول را من départ خصني نخدم في الضومين ديالي أو أنا عندي Bac+5 خصني ندفع كبير !

عرفتي علاش ؟ حيث أغلب recruteurs كعما كيزعم مع profils مزال صغير في السن لعدة اعتبارات، وحيث recruteur ربما معندوش ديك Bac+3 و كعما يجيبك نتا لربما شي نهار ديرليه نوض نوض، وهادشي داز على عيني بزاف الحالات.

10- معمرك تدفع لشي بوسط ماشي في الدومين ديالك أو كثر من المستوى ديالك أو قل من المستوى ديالك، لأنك ماشي بوحدك لدافع و أكيد كاين داك البروفيل المناسب لداكشي لباغين و مغاديش يعيطوا ليك.

دير في بالك أنك ماشي بوحدك لمسيفط السيرة الذاتية CV، كاينة تنافسية وسط 100 شخص وكل واحد ومستوى قرايته وديبلومه وشهاداته وتجاربه، وأنت خصك تميز وتصنع للفرق غي من الشوفة في CV عندك.

11- ديما بين داكشي لنتا مجهد فيه هو اللول في CV أو في مكان بارز لكطيح فيه العين لمرة الأولى، فمثلا عندك formation مطلوبة و متكمن من داكشي ديرها هي اللولة، ايلا عندك expérience مجهدة ديرها هي اللولة أو قاري فشي مدرسة معروفة ….

12- من أضعف الإيمان CV ديالك سميه، لا يعقل مسميه CV-12 أو abcd أو شي تخربيقة، حيث منين كتيلشارجا غادي يتلف وسط الملفات والتحميلات لكاينة، إذا حاجة بسيطة تقدر تضيع عليك فرصة عمل.

وديما ردوا البال فاش كدير Convertir للملف من Word ل PDF را يقدر يتبدلوا شي خطوط و شي كلمات و كيخصروا ليك الديكور في CV.

13- معمرك تكتب شي حاجة في السيرة الذاتية CV غي باش تسمى معمروا فقط، و معمرك دير شي photo كبيرة أو ناقصة في qualité.

14- فيما يخص التواريخ كنديروا الشهر والسنة فقط ونحاولوا نختصروهم ما أمكن، لايعقل ديبلوم عندك فيه جوج كلمات والتاريخ شاد ليك سطر !

مثال : oct.2020 – Nov. 2019

دائما تجنبوا ديك الخ (….) تا واحد ميكمل من راسه في بلاصتك، يا إما كتب داكشي كامل يا إما دير نقطة ورجع للسطر.

15- بعد المرات recruteur خاصه يقلب على بروفيل مزيان و في نفس الوقت بأقل ثمن لهذا دير في بالك باللي profil ديالك كيخلع داك recruteur بمعنى كعما يتسناك تتجي عنده باش تقولوا منخدمش بهاد الصالير !

16- دير في بالك email لكتسيفطه مصنف spam بمعنى را كيمشي boîte spam و كعما كيتشاف و السبب يا إما كتسيفط Candidature ديالك بزاف و شي نهار برزطي شي واحد ودار ليك signaler comme spam.

يا إما نتا مدرتيش référence لقالوا ليك دير في الإميل Objet، حيث الأغلبية كيدير gestion emails عن طريق filtrage أو عنده غي إميل واحد كيوصلوا فيه بزاف Emails فيكدير هاد ريفرونس باش يسهل عليه في عملية البحث.

مثال، كنكون داير عندي في Gmail بزاف الضواسا، كل واحد مسميه، و في Filtrage داير واحد Mot clé لهو Référence، يعني واحد مسيفط ليا إميل فيه كلمة TECH فأوتوماتكمون غيمشي الإميل للضوسي لباغي نلقاه فيه.

16- كاين لكيدير titre في السيرة الذاتية CV دياله و يمكن داك titre هو أحد الأسباب علاش معيطوش ليك، ايلا كنتي دافع لشي بوسط ماشي في الدومين ديالك أو ماشي نفس التخصص لداير نتا، وبالتالي كعما يحتاج يقرا CV عندك، فمن العنوان باين العربون !

17- دير في بالك أنه داك البوسط كاين تنافس عليه، الشركة طالبة عامل واحد وتوصلات ب150 سيرة ذاتية، فكيفاش نتا غتبان وسطهم ؟

النصف قارين نفس تخصصك و النصف الآخر عنده expérience، فهنا أكيد صحاب expérience عندهم الأولوية و وسط هادوا كاين avantage عند الناس لمقادين السيرة الذاتية CV ديالهم، و وسط هادوا لمقادين CV كاين ناس قراب للشركة وبينهم كاين واحد بروفيلات محسوبة على رؤوس الأصابع، هذاك المكلف بالتوظيف غادي يهز التيليفون و يعيط ليهم.

18- دائما دير في بالك كتعامل مع نفسية recruteur، يعني يقدر يشوف CV ديالك و متعجبوش، عادي جدا!

يقدر يشوفك مدايراش foulard و متعجبيش، عادي جدا، يقدر يشوفك دايراه و متعجبيش تا هي عادي جدا!

توقع أي حاجة، ومتستغرب من تا شي حاجة.

توقع أيضا يقدر recruteur يعيط لواحد ساكن في نفس حومته أو مدينته الأصل، توقع أيضا ميعيطش ليك حيث نتا niveau عليه.

توقع أيضا يقدر يكون كيميل للبنات و غادي يعيط فقط للبنات و العكس صحيح، كاين لغايجيه هادشي عجب، ولكن راه كاين و كاين مكثر من هادشي !

19- بعض المرات كتلقى الإعلان عن الخدمة ممحددش بالضبط آشمن بروفيل طالبين، مثلا واش صحاب باك + 3 أو بروفيل تقني، واش خاص تكون تجربة أم لا وشحال عدد السنوات، وبالتالي Chargé/e de recrutement في الشركة كيخلي الإعلان مفتوح على جميع الاحتمالات، وبالتالي الناس لكتقلب على خدمة غادين يسيفطوا السيرة الذاتية CV .. ولكن الشركة را باغا بروفيل محدد وبالتالي انت كتكون ضحية لبحال هاد annonces حيث مولاه غي كيزروط !

20- بعض المرات cabinet de recrutement غي كتلوح annonce فقط باش تبان أنها خدامة قدام “زبناء محتملين” أو باش دير Stock للسيفيات، يعني ما كين لا poste ولا يحزنون، فقط كيضحكوا على عباد الله، حيث هاد المجال لناض كيدير cabinet de recrutement et conseil، كيما كنقولوا المذنبة كبيرة و الميت فار، المذنبة هاد مكاتب التوظيف والفار هي الخدمة لمكيناش !

21- كاين بعض الشركات كيضطروا يديروا annonce أنهم محتاجين لشي واحد وخا داك poste راه ديجا réserver لشي واحد خدام معاهم، هادشي داخل في communication وحيث باغين شهادة qualité !

الخلاصة هو أنك ضروري دير شي احتمال من هادوا و كل جوج سيمانات ايلا معيط ليك تا واحد حاول تبدل CV ديالك، ماشي تبدل الزواق و لكن داكشي لكاتب و structure ديال كل حاجة فيه، ديما دير ليه Mise à jour، ومتنساش تقرا هاد المقالات لغيفيدوك في أي من المواقع خصك تقلب على خدمة أو سطاج.

لعنده شي ملاحظة مرحبا في الكومنطير، واللي بغا نصحح ليه السيرة الذاتية CV دياله يسيفطه لينا عبر صفحة الفايسبوك أو Contact us ولعنده طلب نصايب ليه CV يسيفطه، طبعا منصايبش لكولشي ﻷنه خاص الوقت، لهذا المرجو فقط للناس لمكيعرفوش يصايبوا CV هم ليرسلوا الطلبات، وغنحاول نجاوبكم في 48 ساعة.